Dhjetor, 2005

Click here for English version

Prishtinë, 9 dhjetor 2005

Televizioni mbetet edhe më tutje burimi kryesor i informimit për qytetarët e Kosovës. Mediumet më të preferuara në Kosovë janë TV21, Radio Dukagjini dhe Koha ditore, përderisa mediumet më të besueshme janë Televizioni i Kosovës (RTK-ja), Radio Kosova dhe Koha ditore. Sipas qytetarëve të Kosovës, problemi më i rëndësishëm në Kosovë sot është statusi i padefinuar i Kosovës, bashkë me papunësinë dhe njëherit këto janë dy çështjet më urgjente me të cilat duhet të merret Qeveria e Kosovës. Shumica e të anketuarve (88%) deklarojnë se Kosova duhet të jetë shtet i pavarur brenda kufijve të saj të tanishëm dhe 8% thonë se Kosova duhet të bashkohet me Shqipërinë. Index Kosova, partner me BBSS Gallup International, në nëntor të këtij viti zhvilloi valën e dymbëdhjetë të hulumtimit të mediave në Kosovë. Hulumtimi në terren u zhvillua prej 22-28 nëntor 2005 dhe në hulumtim u përfshinë respondentë shqiptarë dhe minoritete (pa serbë) të Kosovës. Mostra e zgjedhur është reprezentative për popullatën e Kosovës të moshës 15+ vjeçare. Pyetjet mbi mediat iu parashtruan të gjithë respondentëve (1,104 respondentë, margjina e gabimit ±2.9%), përderisa pyetjet politike iu parashtruan vetëm respondentëve të moshës 18+ vjeçare (1,020 respondentë, margjina e gabimit ±3.1%).

Preferencat për mediat

Burimi kryesor i informimit për qytetarët e Kosovës pa dyshim vazhdon të mbetet televizioni (85%) , duke lënë radiot (7%) dhe gazetat (6%) si burime krejtësisht sekondare të informimit. TV21 vazhdon të jetë kanali televiziv më i preferuar në Kosovë (88% - kumulative e tri të përmendurave), duke lënë prapa vetes televizionin publik RTK-në (82%) dhe KTV-në (75%). Edhe pse preferencat e respondentëve për kanale të ndryshme televizive i vendosin televizionet mjaft afër njëri-tjetrit, shikueshmëria aktuale e televizioneve kombëtare në kohën e hulumtimit në terren rezulton me dallime më të theksuara. Kështu, në javën e fundit të nëntorit 2005, 42% e respondentëve e kanë shikuar TV21, 37% RTK-në dhe 22% e kanë shikuar KTV-në. Në këtë aspekt, TV21 ka shënuar një rënie të vogël prej 4% në krahasim me hulumtimin e kaluar në gusht 2005, përderisa RTK-ja dhe KTV-ja kanë shënuar ngritje prej 8%, respektivisht 6%. Televizioni më i besueshëm në Kosovë ende mbetet televizioni publik RTK-ja (48%), pastaj TV21 (32%) dhe KTV-ja (11%). Radio Dukagjini është radio stacioni më i preferuar në Kosovë (46% - kumulative e tri të përmendurave), pastaj renditet Radio Kosova (32%) dhe Radio 21 (11%), ku këto dy të fundit kanë shënuar një rënie të vogël në krahasim me hulumtimin e kaluar në gusht 2005. Në anën tjetër, Radio Kosova është radioja më e besueshme në Kosovë (21%), duke lënë në vendin e dytë Radio Dukagjinin (16%) dhe në vendin e tretë Radio 21 (6%). Radio Kosova dhe Radio Dukagjini kanë shënuar ndryshime të vogla në tre muajt e fundit, përderisa rënie e vazhdueshme vërehet në besimin ndaj Radios 21. Koha ditore mbetet gazeta ditore më e preferuar në Kosovë (38% - kumulative e dy të përmendurave) dhe pas saj renditet Bota sot (19%), Zëri (11%), Epoka e re (8%), Kosova sot (8%), Lajmi (8%) dhe Express-i (4%). Sa i përket besueshmërisë në gazetat ditore, qytetarët e Kosovës më së shumti i besojnë Kohës ditore (29%), pastaj Botës sot (15%), Zërit (6%) dhe Epokës së re (6%)

Çështjet aktuale

Pas vlerësimit pozitiv të përmbushjes së standardeve për Kosovën dhe pas fillimit të bisedimeve për statusin final të Kosovës, duket se qytetarët e kanë zhvendosur theksin e problemit më të rëndësishëm në Kosovë nga papunësia te statusi i padefinuar i Kosovës, në krahasim me hulumtimin e kaluar në gusht 2005, kur papunësia ka qenë problem shumë më i thekuar. Megjithatë, këto dy probleme tani përmenden gati në masë të njëjtë, ku 42% e respondentëve konsiderojnë se statusi i padefinuar i Kosovës është problemi më i rëndësishëm, pastaj 40% e përmendin papunësinë, 4% rrymën/KEK-un dhe nga 3% rindërtimin e ekonomisë/infrastrukturës dhe varfërinë/standardin e ultë jetësor. Urgjenca është rritur edhe më shumë dhe presioni i qytetarëve në Qeverinë e Kosovës është edhe më i lartë për definimin e statusit të Kosovës. Më shumë se gjysma e respondentëve (52%) thonë se statusi i padefinuar i Kosovës është çështja më urgjente me të cilën duhet të merret Qeveria e Kosovës, pastaj përmendet papunësia (18%) dhe rindërtimi i ekonomisë/infrastrukturës (4%). “Kosova duhet të jetë shtet i pavarur brenda kufijve të saj të tanishëm” është statusi të cilin e preferojnë shumica absolute e respondentëve (88%), përderisa rreth 8% shprehen se Kosova do të duhej të bashkohej me Shqipërinë. Nëse Kosova nuk bëhet shtet i pavarur brenda kufijve të saj të tanishëm, qytetarët deklarojnë se do të shprehnin reagime të llojllojshme. Gati një e treta e tyre shprehen se do t’i përkrahnin partitë ose grupet politike që premtojnë zgjidhjen e këtij problemi dhe rreth një e pesta shprehen se do të merrnin pjesë në demonstrata publike. Gjithashtu, rreth 12% thonë se do të bisedonin me familje dhe miq për këtë çështje dhe rreth 9% do të ishin indiferentë duke mos bërë gjë për këtë punë. Megjithatë, një pjesë e respondentëve deklarojnë se revoltën e tyre do ta shprehnin duke kundërshtuar me dhunë (9%) dhe duke i ndihmuar ata që kundërshtojnë me dhunë (6%), ku të dy këto lloje të reagimeve kanë shënuar ngritje në krahasim me hulumtimin e kaluar. Më shumë se gjysma e respondentëve i përkrahin bisedimet me Serbinë për statusin final të Kosovës (39% pajtohen plotësisht dhe 14% pajtohen pjesërisht), përderisa një shumicë më e madhe i përkrah bisedimet me Serbinë për çështjet teknike (38% pajtohen plotësisht dhe 24% pajtohen pjesërisht). Aktualisht, tre liderët ose personalitetet më të preferuara në Kosovë janë Gjenerali Çeku, ish-kryeministri Haradinaj dhe Presidenti Rugova. Gjenerali Çeku ka vazhduar trendin e ngritjes së rejtingut të tij, përderisa ish-kryeministri Haradinaj ka mbajtur përafërsisht rejtingun e njëjtë, kurse Presidenti Rugova ka shënuar një ngritje të theksuar në rejting, në krahasim me hulumtimin e kaluar në gusht 2005. Pas tyre radhitet Nexhat Daci, Soren-Jesen Petersen dhe Hashim Thaçi, rejtingu i të cilëve qëndron relativisht stabil. Pastaj renditet Veton Surroi, që shënon ngritje të vogël në rejting në krahasim me hulumtimin e kaluar në gusht 2005 dhe në fund radhitet kryeministri Bajram Kosumi, rejtingu i të cilit bie vazhdimisht. Qytetarët e Kosovës vazhdojnë t’i besojnë më së shumti TMK-së dhe SHPK-së, institucione që tregojnë trende relativisht stabile sa i përket besimit në institucione. Pas tyre renditen këto institucione: Kuvendi i Kosovës, Kryetari i komunës, LDK-ja, Qeveria dhe AAK-ja, të cilat në krahasim me hulumtimin e kaluar në gusht 2005, kanë shënuar ngritje në besimin ndaj tyre. Pastaj vijnë gjyqet – që shënojnë rënie në besueshmëri, PDK-ja – me trend relativisht stabil dhe Policia a UNMIK-ut, që shënon rënie të vogël në besueshmëri.

Për më shumë informata kontaktoni: Index Kosova joint venture with BBSS Gallup International Rrustem Statovci 42 10000 Prishtinë Tel.: +381(0)38 229 241 Mob.: +377(0)44 218 339 www.indexkosova.com office@indexkosova.com